Nəbi Xəzri
Azərbaycan
şairi, nasir, dramaturq, publisist, tərcüməçi, ssenarist, Azərbaycan SSR xalq
şairi (1984), SSRİ (1973) və Azərbaycan SSR (1982) Dövlət mükafatları laureatı Nəbi Ələkbər oğlu Babayev (Nəbi Xəzri) 10 dekabr 1924-cü ildə Bakı qəzasının Xırdalan kəndində
anadan olub.
1945–1947-ci
illərdə Azərbaycan Dövlət Universitetində,
1947–1949-cu illərdə Leninqrad Dövlət Universitetində,
1949–1952-ci illərdə Maksim Qorki adına Ədəbiyyat
İnstitutunda ali təhsil alıb.
"Çiçəklənən
arzular" adlı ilk şerlər kitabı 1950-ci ildə çap olunub.
1958–1965-ci
illərdə Azərbaycan Yazıçılar İttifaqının katibi, 1965–1971-ci illərdə Azərbaycan Dövlət Televiziya və Radio Verilişləri Komitəsi sədrinin,
1971–1974-cü illərdə isə Azərbaycan mədəniyyət nazirinin müavini vəzifələrində
işləyib. 1974-cü ildən Azərbaycanın Xarici Ölkələrlə Dostluq
və Mədəni Əlaqələr Cəmiyyətinin Rəyasət
Heyətinə sədrlik edib. 1992-ci ildən "Azərbaycan Dünyası" Beynəlxalq
Əlaqələr Mərkəzi adı altında fəaliyyət göstərən həmin təşkilatın prezidenti
olub.
Azərbaycan
Respublikasının ali dövlət təltiflərinə — "Şöhrət" və
"İstiqlal" ordenlərinə layiq görülüb.
60-dan
çox kitabın müəllifidir.
15 yanvar 2007-ci ildə vəfat edib. I Fəxri Xiyabanda dəfn edilib.
